Tungljurtin er fjölær jurt, um 5-25 sm há, sem vex upp af örstuttum, uppréttum jarðstöngli. Ofanjarðarhluti jurtarinnar myndar eitt tvískipt blað. Gróbæri blaðhlutinn ber í toppinn þéttan klasa af hnöttóttum gróhirzlum, sem allar vísa til sömu hliðar. Gróhirzlurnar eru í fyrstu grænar og bústnar, en gulna við þroskun og verða að lokum brúnar og opnast þá með þverrifu í kollinn. Tillífunarhluti blaðsins er fjaður-skiptur, 2-8 sm á lengd og stilklaus eða á stuttum stilk, oftast með 4-8 pörum smáblaða sem eru hálfmána- eða blævængslaga og breið að framan en dragast saman í keilulaga fót nær miðstrengnum. Blaðpörin liggja nokkurn veginn í plani hvert við annað nema neðsta blaðparið sem vísar áberandi fram í átt að stilknum. Smáblöðin eru oftast nokkurn veginn heilrend, en stundum með smáskerðingar í blað-röndina. Þau eru oftast nokkuð breiðari en löng og standa svo þétt saman, að þau skarast verulega, þ.e. þekja blaðrendur hvers annars. Þau eru gaffalstrengjótt, þ.e. strengirnir greinast endurtekið í tvennt frá fætinum í átt að blaðröndinni.