Tófugrasið er miðlungsstór burkni, 10-30 sm á hæð, vex upp af láréttum eða uppsveigðum, fremur stuttum jarðstöngli. Blöðkurnar eru á alllöngum stilk sem oft er þriðjungur til helmingur af lengd blaðsins, sumargrænar. Stilkurinn er grannur og brotgjarn, venjulega brúnn eða rauðbrúnn og gljáandi, en stundum grænn. Blöðkurnar eru margskiptar, tví- til þrífjaðraðar, breiðastar neðan til eða um miðju en mjókka fram í odd. Hliðarsmáblöðin eru oft gisstæð neðst, en þéttstæðari þegar nær dregur oddinum. Þau eru breiðust næst mið-strengnum en mjókka í oddinn. Smáblöð annarrar gráðu eru fjaðursepótt eða flipótt með 5-12 kringlóttum gróblettum í tveim röðum á neðra borði. Gróhula sést til hliðar við þá á meðan þeir eru ungir, en hverfur við meiri þroskun, og þá renna gróblettirnir stundum meir eða minna saman.

Oft geta lítil eintök af tófugrasi líkst öðrum smávöxnum burknum, eins og t.d. liðfætlu. Frá henni þekkist tófugrasið bezt á því að blaðkan er nær alveg hárlaus, en á liðfætlu eru blöðkurnar ætíð ofurlítið loðnar eða flösugar.