Skorutungljurt
Botrychium nordicum
er ný tegund tungljurtar, sem nýlega var uppgötvuð og lýst í tímaritinu Brittonia. Greinin birtist í desember heftinu 2016. Tegundin hefur enn sem komið er aðeins fundist í Noregi og á Íslandi. Það var Peter Struck sem fyrstur fann hana á Íslandi norður við Kaldalón árið 2005, og sendi sýnishorn af henni ásamt fleiri tungljurtum til Donald R. Farrar, tungljurtasérfræðings í Bandaríkjunum.Þessi nýja tungljurt líkist nokkuð venjulegri tungljurt, en hin tungllaga smáblöð eru áberandi skörðótt að framan, og því gætum við kallað hana skorutungljurt á íslensku. Annað einkenni hennar er að stofninn er áberandi hvítur neðst við fótinn og með dökkbrúnni himnu, líklega leifum af kynliðnum sem er undanfari þess hluta tungljurtarinnar sem er ofanjarðar, gróliðarins. Smáblaðpörin eru heldur gisnari en á tungljurt, skarast aðeins lítið eitt. Neðsta blaðparið er í plani við hin líkt og á keilutungljurt, en rís ekki fram eins og á venjulegri tungljurt.
Skorutungljurt hefur fundizt á fjórum stöðum á Íslandi í mismunandi landshlutum. Auk Kaldalóns hefur hún fundizt á Höfn í Hornafirði, í grennd við Jökulsárlón á Breiðamerkursandi, og á Þóroddsstöðum í Ólafsfirði.
Skorutungljurt á Þóroddsstöðum í Ólafsfirði.
Neðsti hluti skorutungljurtar
Smáblaðpör skorutungljurtar nær.