Flóra Íslands - Byrkningar
Dvergtungljurt
Botrychium simplex
er af
naðurtunguætt. Hún finnst allvíða meðfram suðurströndinni, en annars
staðar sjaldgæf. Hún vex einkum í sendnu, mögru graslendi, oft nærri sjó
en einnig á jarðhitasvæðum. Dvergtungljurtin hefur örstuttan, uppréttan
jarðstöngul sem greinist í tvennt við stofninn, í grannan, uppréttan,
gróbæran hluta með klasa af gróhirzlum, og stofnstæða blöðku. Blaðkan
getur verið fjaðurskipt með kringluleit, egglaga eða lítið eitt nýrlaga
smáblöð, en stundum er hún örlítil, heil og óskert. Einnig koma fyrir
þrískiptar blöðkur með stilkuðum, lítið eitt fjaðurskiptum smáblöðum.
Dvergtungljurtin þekkist bezt á því, að blaðkan er alveg neðst í
sverðinum, en gróbæri hlutinn er vel uppréttur.
