Myndin af blómsefinu er tekin árið 1983.
Blómstrað blómsef í návígi
Aldini blómsefs í návígi
Smávaxin, fjölær jurt með ógreindan
stöngul og eitt lítið, endastætt blómhnoða með þrem til fjórum blómum.
Brún, snubbótt stoðblöð eru framan við hvert blóm, en þar fyrir innan
eru blómhlífarblöðin sex í hverju blómi, gulhvít eða bleikleit en dekkri
í endann, snubbótt eða sljóydd. Fræflar eru sex, svipaðir að lengd og
blómhlífin, með gulhvítar frjóhirslur. Ein ljósleit fræva með þrískiptu
fræni er í miðju blómsins. Við þroskun verður aldinið dökkrauðbrúnt, 5-6
mm langt með stuttri trjónu í toppinn, klofnar í þrennt við opnun. Fræin
eru brún í miðju með ljósu viðhengi á báðum endum, í heild um 3 mm á
lengd. Blöðin eru sívöl, aðeins neðst á stönglinum eða stofnstæð.
Blómsefið er fremur auðþekkt frá
öðrum sefum, líkist helst flagasefi sem einnig hefur eitt lítið,
endastætt blómhnoða. Blómsefið þekkist frá því í blóma á hinni
ljósbleiku blómhlíf, og á því að stoðblað blómskipunarinnar er mjög
stutt eða vantar. Á flagasefi er lítið stoðblað áberandi til hliðar við
blómskipanina eða aldinin. Í aldini sést vel að blómsefið er 3-4 blóma,
en flagasefið oftast tvíblóma. Litningatalan er 2n = 50.
Blómsefið vex einkum í rökum flögum
og annars staðar í vætu. Það er algengt um allt land frá láglendi upp í
750 m hæð. Hæst hefur það fundist 920 m við Gæsavötn, og í 800 m í
Mávatorfu í Innri Veðurárdal í Suðursveit.
Blómsefið er fyrst skráð eftir
safni Königs frá 1765, og í ferðabók Sveins Pálssonar er þess getið í
nágrenni Austurhlíðar í Biskupstungum.
Blómsef í víðustu merkingu er útbreitt allan hringinn um norðurhjarann, og er í fjöllum sunnar í Evrópu. Sumir kjósa hins vegar að kljúfa það í tvö afbrigði eða tvær tegundir, Juncus triglumis og Juncus albescens (2n = 44). Ef við höldum okkur við þá skiptingu er blómsefið Evrópsk tegund sem nær nokkuð austur eftir Asíu, en Juncus albescens tekur við austast í Síberíu, Alaska, Kanada, og á Grænlandi, en nær ekki til Evrópu nema á Svalbarða. Mörkin milli þessara tegunda eru ekki fullljós
Myndin af blómsefinu er tekin árið 1983.
Blómstrað blómsef í návígi
Aldini blómsefs í návígi