Hundasúran er fjölær jurt með einkynja blóm í sérbýli. Blómin eru mörg saman í klasaleitum, samsettum blómskipunum. Blómhlífin er 6-blaða, þrjú þau ytri mjó og odddregin, þrjú þau innri breiðari og ávöl í endann. Blómhlífarblöð karlblóma eru rauðleit, sjaldnar fölgræn, blómhlífarblöð kvenblóma eru dökkrauð. Sex fræflar eru í karlblómum, frjóhirzlurnar í fyrstu gular en síðar rauðleitar. Ein fræva er í kvenblómum með þrjú, marggreind, hvítleit fræni. Frævan verður við þroskun að einfræja, gulbrúnni hnetu. Laufblöðin eru stakstæð, stilkuð, með allstóru glæru og himnukenndu slíðri umhverfis blaðfótinn. Blaðkan er spjótlaga eða lensulaga, 2-6 sm löng og 2-20 mm breið, heilrend en með útstæðum eyrum neðst.

Hundasúran líkist nokkuð túnsúru, en þekkist bezt frá henni á lögun laufblaðanna. Þau hafa áberandi útstæð eyru við blaðfótinn, en blöð túnsúrunnar eru örlaga og vísa eyrun niður í átt að stilknum.

Hundasúran er afar breytileg tegund, bæði að því er varðar litninga-mengi og ytra útlit. Innan hennar eru bæði tví-, fjór- og sexlitna stofnar, laufblöðin eru afar mismunandi að gerð og blómin mismunandi. Erfitt hefur reynst að finna samræmi milli útlitseinkenna og litningamengja, og því hafa misvísandi tilraunir verið gerðar með að skipta tegundinni niður í deilitegundir og afbrigði. Samkvæmt Norðurlandaflórunni eru þrjár af deilitegundum hennar taldar útbreiddar hér á landi: Subsp. acetosella, subsp. tenuifolius (Wallr.) O.Schwarz  og subsp. arenicola Y. Mäkinen ex Elven. Ekki eru alltaf glögg skil á milli þessara deilitegunda. Sú fyrstnefnda hefur nokkru breiðari blöð en hinar, eyrun eru einnig hlutfallslega breið og vísa oft á ská niður að stilknum. Subsp. tenuifolius hefur mjög mjó blöð, og eyrun eru afar mjó og vísa gjarnan upp í átt að blaðendanum. Á subsp. arenicola vantar oft eyru á blöðin.