Skammkrækill í Hrísey á Eyjafirði árið 1997. Ef myndin er stækkuð má greinilega sjá hvernig bikarblöðin brettast út og niður eftir aldinþroskun, og einnig má sjá að nokkur blóm eru fimmdeild.
Skammkrækillinn er hárlaus jurt,
oft með marga blómstöngla frá sömu rót. Blómin eru flest fjórdeild og
aðeins 2-2,5 mm í þvermál, stundum eitt og eitt fimmdeilt. Krónublöð
vantar oft, eru annars hvít og þá oftast mjög stutt, miklu styttri en
bikarblöðin. Bikarblöðin eru sporbaugótt, ljósgræn, 1,5-2,5 mm á lengd,
með mjóum, glærum himnufaldi, lykja um knappinn meðan blómið er að
þroskast, en brettast síðan aftur á bak og eru útrétt þegar aldinið fer
að þroskast. Fræflar eru venjulega fjórir, ein fræva með fjórum til fimm
stílum, verður við þroskun að topp- eða perulaga hýðisaldini sem opnast
með fjórum til fimm tönnum í toppinn. Fræin eru örsmá, um 0,3 mm í þvermál.
Blöðin eru gagnstæð, striklaga, með um 0,2 mm löngum broddi í endann,
stöngulblöðin oft um 3-6 mm á lengd, en stofnblöðin lengri.
Skammkrækill í Hrísey á Eyjafirði árið 1997. Ef myndin er stækkuð má greinilega sjá hvernig bikarblöðin brettast út og niður eftir aldinþroskun, og einnig má sjá að nokkur blóm eru fimmdeild.