Alaskaösp
Populus trichocarpa
er innflutt trjátegund, sem kom fyrst til landsins um miðja síðustu öld. Hún er ákaflega hraðvaxta og er víða á landinu orðin töluvert yfir 20 metrar á hæð og getur myndað feiknar svera boli. Strax um 1990 varð þess vart að hún er farin að sá sér frjálslega, einkum fær hún set á röskuðum svæðum, t.d. meðfram nýgerðum vegum og víðar. Hún myndar einnig mikið af rótarskotum, sem jafnan koma upp í nokkurra metra fjarlægð frá móðurplöntunni. Fræin eru hins vegar svo sviflétt að þau svífa langar leiðir og sáðplöntur koma oft upp í nokkur hundruð metra eða kílómetra fjarlægð frá móðurplöntunum. Ný kynslóð af sjálfsánum öspum er sums staðar búnar að ná fullri hæð. Þetta tré mun því fjölga sér og dreifast í íslenzkri náttúru á komandi árum. Öspin blómstrar rétt í byrjun laufgunar, í apríl eða maí eftir árferði.
Myndin af þrískiptum bol alaskaaspar er tekin á Arnarhóli í Kaupangs-sveit 1. maí 2007.
Börkur alaskaaspar er grábrúnn, yngri sprotar rauðbrúnir, hárlausir, og ársprotar eru grænleitir. Blöðin eru fagurgræn, gljáandi á efra borði en lítið eitt ljósari neðan, hárlaus, egglaga og odddregin eða hjartalaga, heilrend, 8-18 sm löng en 5-12 sm breið, oft límkennd og sitja á gulgrænum eða bleikleitum, 2-5 sm löngum stilk. Karlblómin eru í 5-8 sm löngum reklum, frjóhirzlur í fyrstu rauðar en síðar gulbrúnar til fjólubláar. Kvenblómin eru í 10-20 sm löngum reklum sem oft losna af eftir fræfall. Fræin örsmá, svífa langar leiðir á dúnmjúkum ullar-hnoðrum. Kortið hér að neðan sýnir staði þar sem alaskaösp er farin að sá sér út.
